Иккинчи жаҳон уруши йилларида ўзбекистонлик аскар Боқижон Акрамовнинг ҳаётини сақлаб қолган Буюк Британия фуқаролари – марҳум Жон ва Филлис Эмили Ле Бретон Ўзбекистоннинг “Дўстлик” ордени билан мукофотланди. Шавкат Мирзиёев бу тўғрисидаги тегишли фармонни имзолади.

Фармонда қайд этилишича, Жон ва Филлис Эмили Ле Бретон Иккинчи жаҳон уруши даврида Жерси оролидаги фашистлар концлагеридан қочиб чиққан ўзбекистонлик аскар Боқижон Акрамовни ўз уйида яшириб, унинг ҳаётини сақлаб қолган. Ҳужжатда улар ғоят таҳликали шароитда ўз ҳаётини хавф остига қўйиб, жасорат ва юксак инсонпарварлик фазилатларини намоён этгани, шунингдек, халқлар ўртасида тинчлик, дўстлик ва биродарлик ғояларини тарғиб этишда алоҳида ўрнак бўлгани таъкидланган.

Jersey Evening Post 2022 йилда эълон қилган мақолада Ле Бретонлар оиласи уруш йилларида Жерси оролининг Цент Мери ҳудудидаги уйида украин асирини яширгани ҳақида ёзганди. Оила аъзолари уни Том деб атаган. Президент фармонидан бу шахс айнан фашистлар лагеридан қочган ўзбекистонлик аскар Боқижон Акрамов экани маълум бўлди.

Ле Бретонларнинг қизи Керолин Хорн ББCъга берган интервьюсида ота-онаси ҳар қандай пайт қўлга тушиши мумкин бўлганига қарамай, Акрамовни оиланинг бир аъзоси сифатида қабул қилганини айтган. Унинг сўзларига кўра, аскар болалар билан яқин бўлиб кетган, улар уни ҳатто “энг севимли амаки” деб атаган.

Қайд этилишича, у немислар келиб қолса яшириниш учун бир неча бошпанага эга бўлган, Ле Бретонлар эса уйида махсус яширин йўлак ва тузоқ эшиклар тайёрлаб қўйган. У инглиз тилини бироз ўрганганидан кейин болаларга эртаклар ўқиб берган.

Урушдан кейин Боқижон Акрамов Гернси оролига кўчиб ўтган, шундан сўнг оила у билан алоқани йўқотган. Унинг кундалиги нусхалари кейинчалик Jersey Heritage архивига топширилган.