Айни вақтда “Халқлар дўстлиги” майдонида Ўзбекистон Республикаси Давлат байроғи қабул қилинганига 31 йил тўлиши муносабати билан “Муқаддасдир Ватан байроғи!” шиори остида тантанали байрам тадбири ўтказилмоқда.

Республика Маънавият ва маърифат маркази  томонидан ташкил этилган тадбирда давлат ва жамоат арбоблари, таниқли шоир ва ёзувчилар, маданият ва санъат намояндалари, спортчилар, ҳарбийлар, фаол ёшлар, ОАВ вакиллари ва кенг жамоатчилик вакиллари иштирок этмоқда.

Тадбирда Республика Маънавият ва маърифат маркази раҳбари Минҳожиддин Ҳожиматов сўзга чиқиб, Давлат байроғи ҳар бир ўзбекнинг ғурури, ифтихори эканини таъкидлади.

“Янги Ўзбекистонни қудратли давлатга айлантириш йўлида бир байроқ остида бирлашишимиз керак. Бир мақсад йўлида фидоийлик билан, қўлни қўлга бериб яшаш инсонга берилувчи энг олий неъмат”, деди у.  

Тантанали тадбир давомида Ватанни мадҳ этувчи куй ва қўшиқлар ижро этилиб, “Темурбеклар мактаблари” ўқувчилари иштирокида ҳарбий чиқишлар намойиш этилди.

Эслатиб ўтамиз, Давлат байроғи қабул қилинган куннинг 31 йиллиги бутун республикамиз бўйлаб тантанали тарзда нишонланмоқда.