2022/2023 ўқув йили учун коллеж ва техникумларнинг тўлов-контракти миқдори ўтган йилда белгиланганидек сақлаб қолинадиган бўлди. Бу ҳақда Олий ва ўрта махсус таълим вазирлиги хабар берди.

Қайд этилишича, мазкур тартиб барча босқич ўқувчиларига тегишли.

Маълумот учун, бу йили коллеж ва техникумларнинг кундузги таълим шаклига 15 минг 815 нафар ўқувчи давлат гранти асосида қабул қилинди.

Шунингдек, профессионал таълим муассасаларига ота-она қарамоғидан маҳрум бўлган ўқувчилар ҳамда ижтимоий ҳимояга муҳтож оила фарзандлари белгиланган тартибда қабул параметрларидан ташқари қўшимча давлат гранти асосида қабул қилинади.