1946 йил 15 октябрда Наманган вилояти Уйчи туманида таваллуд топган.

1967 йилда Тошкент тўқимачилик ва енгил саноат институтини тамомлаган.

Ўз фаолиятини 1967 йилда ўқитувчиликдан бошлаган.

1968 йилдан Намангандаги тўқима матолар ишлаб чиқарадиган корхоналарда ишлаган.

1996 йилдан республика Меҳр-шафқат ва саломатлик жамғармаси вилоят бўлими раиси.

2002 йилда “Ўзбекистон Қаҳрамони” унвони билан тақдирланган.

2016 йилда вафот этган.

Акрамова Дилбар Абдулҳамидовна 1962 йилда Тош­кент тўқимачилик ва енгил саноат институтига ўқиш­га қабул қилиниб, муҳандис-технолог мутахассислиги бўйича диплом олди.

Отасининг изидан борган Дилбархон ўз фаолиятини Наманган вилояти тўқимачилик техникумида ўқитувчиликдан бошлади. Кейинчалик у фаолиятини ўз мутахассислиги бўйича ишлаб чиқаришда давом эттириб, 1968–1970 йилларда Наман­ган нотўқима матолар ишлаб чиқариш фабрикаси лаборатория бошлиғи лавозимида ишлади. Ўз касбига нисбатан ниҳоятда қизиқиши, фидойилиги, меҳнатсеварлиги натижасида Дилбар Акрамова нотўқима матоларни ишлаб чиқариш сир-асрорла­рини пухта ўрганди, шунингдек, фабрикадаги кўплаб ёшларга билим ва кўникмаларини сингдириб борди. Ўзига нисбатан ўта талабчан Дилбар Акрамова ҳар соҳада тенгдошлари ва ҳам­касбларига ўрнак бўлгани боис, 1970 йилда шойи ишлаб чиқа­риш комбинатида ёшлар етакчиси бўлиб иш фаолиятини давом эттирди. Иш жараёнида соҳани янада ривожлантириш бораси­даги талаб ва таклифларни изчил ўрганиб, уни амалиётга тат­биқ этди ҳамда ижобий натижаларга эриша олди.

1975 йилда Дилбархон аврли шойи ишлаб чиқариш комби­нати пиллакашлик корхонасига раҳбар ўринбосари лавозимига ўтказилди. Ипак маҳсулотларига бўлган талаб жаҳон бозорида ошиб бораётганлигини ҳисобга олган Д.Акрамова ўз навбатида комбинатда маҳсулот ҳажмини босқичма-босқич ошириш бо­расида ўз мулоҳазаларини ва изланишларини амалга ошириб борди. Мана шундай жараёнларда у ўзининг ташаббускорлиги билан корхонада ҳурматга сазовор бўлди.

Қайси корхона ёки ташкилотда ишламасин, ўз мақсадлари йўлидан оғишмайдиган қаҳрамонимиз 1986 йилда Наманган бадиий буюмлар фабрикасида директор лавозимида ўз фао­лиятини давом эттирди. Ушбу фабрикада ўн йил давомида са­марали меҳнат қилган Дилбархон Акрамова ўз жамоаси билан бир оиладек бўлиб ишлади ҳамда фабриканинг ривожланиши­га муносиб ҳиссасини қўшди.

1996 йилдан бошлаб Ўзбекистон Меҳр-шафқат ва саломат­лик жамғармаси Наманган вилояти бўлими раиси лавозимида ишлаб, юзлаб қалбларга меҳр улашиш билан бирга юртдошла­рининг саломатлигини тиклашда ҳам қўлидан келган ёрдами­ни аямади. Бу орада Намангандаги нуфузли хотин-қизлардан бирига айланиб улгурган Дилбар Акрамова ўзи каби жўшқин ҳаётга интилувчан, касбини севувчи талай ёшларга устозлик қилди.

Сир эмас: ўзбек миллий матолари бугунги кунда дунё мода­лар оламида юқори баҳоланади. Кўҳна Наманганда тўқилади­ган ранг-баранг ва бетакрор матолар – жилоси кўзни қамашти­рувчи атласлар, санъат асари каби кўплаб мамлакатларда ўз шинавандалари қалбини забт этган адрасу шойилар саноатининг янада такомилла­шувида ўз касбининг моҳир устаси Дилбар Акрамованинг салмоқли ҳиссаси бор, десак муболаға бўлмайди.

Маҳалладошлари, ҳамюртлари тақдирига бефарқ қарай олмаслик Дилбар Акромовага ота-онасидан мерос. У ўзи истиқомат қилган маҳалласида тузилган “Кексалар маслаҳа­ти” гуруҳининг жамоатчи аъзоси сифатида маҳалладаги ёш оилалардан, турмуши­да қийинчиликларга учраган кишилардан маслаҳат ва ёрдамларини аямасди. Турли корхона ва ташкилотларда масъулиятли лавозимларда ишлаб юрган кезларида ҳам маҳалладошлари учун вақт ажратишни ўз бурчи деб ҳисоблади. Маҳаллада бўладиган тадбирлар, оммавий ҳашарлар ва тўй-ма­ракаларга бош-қош бўлиб, миллий анъана ва қадриятларимизни асраб-авайлаш, ўза­ро ҳурмат ва меҳр-оқибатли бўлиш, ортиқ­ча шуҳратпарастлик ва исрофгарчиликка йўл қўймаслик бўйича ёшларга ибрат бўла олди, шунингдек, доимий равишда кам таъминланган, боқувчисини йўқотган, ногирон­лиги бор, халқона қилиб айтганда, ўзгалар парвариши ва меҳрига муҳтож оилаларга ғамхўрлик қилди. Дилбар Акромова бай­рамларни кам таъминланган ва ижтимоий ҳимояга муҳтож оилалар ҳолидан хабар олишдан бошлар, қўлдан келганча уларга кўмаклашар эди.

Элда “Олтин олма, дуо ол”, деб бежиз айтилмаган. Кўплаб юртдошлари дуосини олган Дилбар Акрамова “Ўзбекистон Қаҳра­мони” унвони билан тақдирланди.

Дилбар Акрамова оилада оқила рафиқа, меҳрибон она эди. Турмуш ўртоғи Жўраев Абдуллажон билан бирга уч нафар фарзанд­ни ҳар томонлама элга манзур қилиб тар­биялади. Катта фарзанди муҳандис, қолган икки нафари ўқитувчик касбини эгаллади.

Ҳаёти ва фаолиятидаги фидойилиги юк­сак мартаба ва улкан муваффақиятлар олиб келди. Дилбар Акрамова ибратли ҳаёт йўли­ни босиб ўтди.