Qoraqalpogʻistonlik yoshlarga oliy taʼlim muassasalariga kirish uchun 7 mingga yaqin alohida kvota ajratiladi. Oʻzbekiston Prezidenti Shavkat Mirziyoyev Qoraqalpogʻiston Joʻqorgʻi Kengesining navbatdan tashqari sessiyasida respublika parlamenti raisi nomzodining taklifidan kelib chiqib, shunday koʻrsatma berdi.

Prezident mutasaddilarga:

• Qoraqalpogʻistondagi yosh tadbirkorlarga 7 yilgacha muddatga imtiyozli shartlarda ssudalar ajratishni yoʻlga qoʻyish;

• boʻsh turgan davlat obyektlarida yoshlar va xotin-qizlarni xorijiy tillar va IT sohasiga oʻqitish kurslarini tashkil etish imkoniyatini yaratish, ushbu obyektlarni tadbirkorlarga 5 yilgacha bepul foydalanishga berish;

• Qoʻngʻirot, Nukus va Chimboy tumanlarida 4 ta “Ishga marhamat” mono-markazlarini tashkil etish;

• faqat Qoraqalpogʻistonlik yoshlar uchun mamlakatimizdagi barcha oliygohlarga alohida 6,5 mingta qabul kvotalari joriy etish;

• Qoraqalpogʻistondagi ehtiyojdan kelib chiqib, ekologiya, qishloq xoʻjaligi, irrigatsiya, qurilish sohalarida tayanch doktoranturada qoʻshimcha kadrlar tayyorlashni yoʻlga qoʻyishga topshiriq berdi.