Xorazm viloyatida 2 ta shahar va 5 ta tuman hokimlari hayfsan jazosini oldi. Bu viloyat hokimining 23-avgust kungi farmoyishida belgilangan.

Viloyat hokimi farmoyishiga koʻra, faoliyati davomida “Bozor tamoyillariga asoslangan ipoteka kreditlari ajratish orqali aholining uy-joy bilan taʼminlashga oid qoʻshimcha chora-tadbirlari toʻgʻrisida”gi Preizdent farmoni ijrosini belgilangan muddatda taʼminlamasdan masʼuliyatsizlikka yoʻl qoʻygani, uy-joy sotib olish uchun ijobiy xulosa olgan 92 nafar fuqaroga amaliy yordam bermagani, avgust oyida subsidiya ajratish muddati oʻtib ketishiga yoʻl qoʻygani uchun, Mehnat kodeksining 181-moddasi 2-bandiga asosan:

– Urganch shahar hokimi Xolboyev Oybek Madaminovichga;

– Xiva shahar hokimi Davletov Temur Ismoilovichga;

– Bogʻot tumani hokimi Yaxshibayev Shavkat Qurambayevichga;

– Hazorasp tumani hokimi Masharipov Uktam Rustamovichga;

– Urganch tumani hokimi Sharipov Frunze Ilxomovichga;

– Tuproqqalʼa tumani hokimi Salayev Alisher Roʻzmetovichga;

– Yangiariq tumani hokimi vazifasini bajaruvchi Davletov Anvar Kenjayevichlarga “Hayfsan” intizomiy jazo chorasi qoʻllangan.

Bundan tashqari, hokimning boshqa bir farmoyishiga koʻra, Xorazm viloyati hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari-viloyat iqtisodiy taraqqiyot va kambagʻallikni qisqartirish bosh boshqarmasi boshligʻi Achilov Murodjon Azamatovichga ham hayfsan intizomiy jazo chorasi qoʻllangan.