Prezident Savdo-sanoat palatasi va uning xududiy boʻlinmalarining faoliyati ham tubdan oʻzgarishini aytdi.

Bundan buyon, ular:

- tuman, shahar tadbirkorlarini birlashtirib, ularni qiynayotgan muammo va masalalarni aniqlash bilan amalda shugʻullanadi;

- har bir tuman va shaharda ilgʻor metodikalar asosida biznesga oʻqitish maktablarini tashkil qiladi;

- hokim va boshqa hududiy rahbarlarga koʻrib chiqishi majburiy boʻlgan taqdimnomalar kiritish vakolatiga ega boʻladi;

- mahalliy Kengash va hokimlar bilan har oy kamida ikki marta tanqidiy muhokamalarni oʻtkazadi.

Shu bilan birga, Savdo-sanoat palatasining oʻziga ham:

- Hukumatga koʻrib chiqishi majburiy boʻlgan masala kiritish;

- tadbirkor manfaatini koʻzlab  Oliy sudga ariza berish hamda iqtisodiy, maʼmuriy va jinoyat ishlari boʻyicha sud qarorlarini qayta koʻrib chiqish yuzasidan shikoyat kiritish vakolatlari beriladi.

Savdo-sanoat palatasi Hukumat boʻysunuvidan toʻliq chiqariladi.

Prezident matbuot xizmatining maʼlum qilishicha, uchrashuvda aytilgan barcha takliflarni amalga oshirish uchun Prezident huzurida Tadbirkorlikni qoʻllab-quvvatlash boʻyicha Jamoatchilik kengashi tuziladi.

Shuningdek, Prezident Administratsiyasi rahbariga ikki hafta muddatda ushbu kengash ishini tashkil qilish topshirildi.