Prezident “Pedagogik taʼlim sifatini oshirish va pedagog kadrlar tayyorlovchi oliy taʼlim muassasalari faoliyatini yanada rivojlantirish chora-tadbirlari toʻgʻrisida”gi qarorni imzolagan.

Unga koʻra:

• Urganch davlat universiteti pedagogika taʼlim sohasining bakalavriat taʼlim yoʻnalishlari va magistratura mutaxassisliklari negizida Urganch davlat pedagogika instituti;
• Namangan davlat universiteti pedagogika taʼlim sohasining bakalavriat taʼlim yoʻnalishlari va magistratura mutaxassisliklari negizida Namangan davlat pedagogika instituti;
• Guliston davlat universiteti pedagogika taʼlim sohasining bakalavriat taʼlim yoʻnalishlari va magistratura mutaxassisliklari negizida Guliston davlat pedagogika instituti;
• Samarqand davlat universitetining Oʻzbekiston-Finlyandiya pedagogika instituti negizida Oʻzbekiston-Finlyandiya pedagogika instituti;
• Andijon davlat universitetining Pedagogika instituti negizida Andijon davlat pedagogika instituti;
• Buxoro davlat universitetining Pedagogika instituti negizida Buxoro davlat pedagogika instituti;
• Termiz davlat universitetining Pedagogika instituti negizida Termiz davlat pedagogika instituti;
• Qarshi davlat universitetining Pedagogika instituti negizida Shahrisabz davlat pedagogika instituti;
• Chirchiq davlat pedagogika instituti negizida Chirchiq davlat pedagogika universiteti;
• Jizzax davlat pedagogika instituti negizida Jizzax davlat pedagogika universiteti tashkil etiladi.

Qarorga muvofiq, 2022/2023 oʻquv yilidan boshlab:

• pedagog kadrlar tayyorlovchi OTM kunduzgi taʼlim shaklida tahsil olayotgan 2-4-bosqich talabalari uchun haftalik oʻquv mashgʻulotlari “4+2” tartibida, shu jumladan, darslarning 4 kuni OTMda, 2 kuni maktabgacha va umumiy oʻrta taʼlim muassasalarida amaliyot oʻtash tartibida olib boriladi;
• har yili pedagog kadrlar tayyorlovchi OTM ixtisoslik kafedralarining kamida 5 foiz professor-oʻqituvchilarini ushbu muassasalarning byudjetdan tashqari jamgʻarmalari hisobidan xorijiy davlatlarga tanlov asosida malaka oshirish va stajirovkaga yuborish choralari koʻriladi.

2023/2024 oʻquv yili qabulidan boshlab pedagogik kadrlar tayyorlovchi OTMlarning mazkur qarorga 1-ilovada koʻrsatilgan taʼlim yoʻnalishlari boʻyicha sirtqi taʼlim shakliga qabul amalga oshirilmaydi. 1-ilovada koʻrsatilmagan pedagogika sohasidagi taʼlim yoʻnalishlariga sirtqi taʼlim shakli boʻyicha oʻqishga taʼlim tizimida pedagogik faoliyatga oid kamida besh yillik ish stajiga ega boʻlgan shaxslar qabul qilinadi.