Qirgʻizistonning Oʻsh viloyatida joylashgan Qora-Suv tumanida hududni Oʻzbekiston bilan bogʻlaydigan ikkinchi yer osti tunneli topildi. Bu haqida qoʻshni davlat Milliy xavfsizlik davlat qoʻmitasi matbuot markazi xabar berdi.

Qayd etilishicha, 4-iyun kuni turar-joy binosidagi beton qoplamasi ostidan yashirin oʻtish joyi aniqlangan.

Aniqlanishicha, tunnelning chuqurligi 17,5 metr, kirish qismi balandligi 1,8 metr, kengligi 70-80 santimetr, uzunligi taxminan 155 metrni tashkil qiladi.

Eslatib oʻtamiz, 20-may kuni Qorasuv tumanidagi Telman qishlogʻida 270 metrli ikki davlatni bogʻlovchi maxfiy tunnel topilgandi.