“Yoqilgʻi-energetika resurslarining narxlarini oʻzgartirish toʻgʻrisida” hukumat qarori loyihasi muhokamaga qoʻyildi.
 

Loyiha ikki jihatiga koʻra ahamiyatli:
 

• elektr energiyasi, tabiiy va suyultirilgan gaz tariflari oshirilmoqda;
• energetika islohotining aniq muddatlari belgilanmoqda – bu islohot elektr va gaz tanqisligiga barham berishi lozim.
   

Tabaqalashtirilgan toʻlov tizimiga oʻtiladi
 

Elektr va gaz tariflariga ijtimoiy norma kiritilib, aholining koʻp energiya sarflaydigan (nisbatan oʻziga toʻq) qatlami xarajatlarini byudjetdan subsidiyalash qisqartiriladi.
 

Ijtimoiy norma miqdorini quyidagicha belgilash taklif etilmoqda:
 

• elektr energiyasi isteʼmoli boʻyicha 250 kVt soatgacha;
• tabiiy gaz boʻyicha oktyabr-mart oylari uchun 700 kub metrgacha;
• aprel-sentyabr oylari uchun 200 kub metrgacha.

Quyida keltirilayotgan yangi narxlar 2022-yil 1-iyuldan boshlab joriy etilishi kutilmoqda. 

1 kVt soat elektr energiyasi uchun taklif etilayotgan yangi narxlar (aholi uchun):
 

• ijtimoiy norma doirasida: oyiga 250 kVt soatgacha – 325 soʻm (hozir 295 soʻm);
• 250 kVt soatdan yuqori har 1 kVt soat uchun – 650 soʻm.

Rasmiy izohga koʻra, taklif etilayotgan narxlar tasdiqlansa, xonadonlarning xarajati quyidagicha summaga oshadi:
 

• 250 kVt soatgacha elektr energiya ishlatadigan abonentlar uchun qoʻshimcha xarajat oyiga 7,5 ming soʻmgacha;
• 300 kVt soatgacha ishlatadigan abonentlar uchun qoʻshimcha xarajat oyiga 25 ming soʻmgacha;
• 400 kVt soatgacha elektr energiya ishlatadigan abonentlar uchun esa qoʻshimcha xarajat oyiga 61 ming soʻmgacha boʻladi.