Bosh prokuratura huzuridagi Departamentning Andijon tuman boʻlimi tomonidan oʻtkazilgan tergovga qadar tekshiruvda, tuman pochta aloqa bogʻlanmasi sobiq bosh hisobchisi K.A. va boshqalar oʻzaro til biriktirib, bank-kliyent dasturiga soxta maʼlumotlar kiritish orqali aholidan aliment va kommunal toʻlovlari uchun undirilgan 172 million soʻmni oʻzlashtirish yoʻli bilan talon-toroj qilganliklari aniqlangan.

Mazkur holat yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qoʻzgʻatilib, tergov harakatlari oʻtkazilmoqda.