Oʻzbekistonning Kiyevdagi elchixonasi vatandoshlar uchun Telegram guruhi orqali Ukraina hududida boʻlgan oʻzbekistonliklarga murojaat qildi.

Qayd etilishicha, murojaatda elchixona “tasdiqlanmagan, soxta maʼlumotlarni tarqatmaslikni va vahima qoʻzgʻamaslikni” soʻragan.

“Elchixona Ukraina davlat organlari, diplomatik korpus va yurtdoshlarimiz bilan doimiy aloqada”, deyiladi murojaatda.

Elchixona, shuningdek, “Oʻzbekiston havo yoʻllari” Milliy aviakompaniyasi Kiyevga muntazam reyslar amalga oshirayotgani va manfaatdor fuqarolar Kiyev–Toshkent yoʻnalishi boʻyicha Oʻzbekistonga qaytishlari mumkinligi haqida maʼlum qilgan.