Tez orada Toshkentda O‘zbekistondagi Islom sivilizatsiyasi markazi ishga tushadi. Bu haqda kecha Milliy matbuot markazida Islom sivilizatsiyasi markazi tomonidan o‘tkazilgan matbuot anjumanida ma’lum qilindi.

Qayd etilishicha, Toshkent shahrining “Hazrati Imom” majmuasi (Hastimom) yonida qad rostlayotgan markaz 9 gektar maydonni egallamoqda. Uning tarkibida yurtimizdagi islom olamiga oid qimmatli manbalarni jamlagan muzey tashkil etilishi kutilyapti. 

Xususan, mashhur “Katta Langar Qur’oni” va dunyo sivilizasiyasi tarixidagi eng nodir manba hisoblangan “Usmon Mus’hafi” ham muzeydan o‘rin oladi. Markaz qachon rasman o‘z faoliyatini boshlaydi, degan savolga markaz rahbari Shoazim Minovarov hozirda qurilish ishlari davom etayotganini va 2022-yilning to‘rtinchi choragida qurilish ishlari yakunlanishini qayd etdi.