Toshkent tibbiyot akademiyasining faxriy professori, akademik Daminov Turgʻunpoʻlat Obidovich 81 yoshida vafot etdi. Bu haqida Innovatsion rivojlanish vazirligi axborot xizmati xabar berdi.

T.Daminov – pediatr-infeksionist olim, Oʻzbekiston FA akademigi (2000), Oʻzbekistonda xizmat koʻrsatgan vrach (1980), tibbiyot fanlari doktori (1986), professor (1987), ToshTIni tugatgan (1964). Bolalar yuqumli kasalliklari kafedrasi assistenti, dotsenti (1969-82), mudiri (1982 – 84), Oʻzbekiston Sogʻliqni saqlash vazirligi pediatriya ITI direktori (1984 – 90), 1-ToshTI rektori (1990 y. dan).

Daminov bolalarda uchraydigan gepatitning davomli va surunkali xillari shakllanishini klinik-patogenetik nuqtayi nazardan oʻrgandi. Bolalarda uchraydigan V virusli gepatitning davomli xilini samarali davolash usulini ishlab chiqdi va amaliyotga tatbiq etdi. Koʻpincha chaqaloqlar oʻlimiga sabab boʻladigan nafas yoʻllari kasalliklari belgilarini aniqladi.

1997-yildan Oʻzbekiston Oliy Majlisi deputati, Oʻzbekiston “Adolat” sotsial-demokratik partiyasi Siyosiy kengashining birinchi kotibi (1995 y. dan) lavozimlarida ishlagan. U “Oʻzbekiston milliy ensiklopediyasi” bosh tahrir hayʼati aʼzosi (1997 y. dan), Polsha tibbiyot fanlari akademiyasi akademigi (1999), “Doʻstlik” ordeni bilan mukofotlangan (1997).