“Transparency International” xalqaro tashkiloti 2021-yil uchun “Korrupsiyani qabul qilish indeksi”ning yangilangan reytingini eʼlon qildi.

Unga koʻra, Oʻzbekiston 2020-yilga nisbatan 6 pogʻonaga koʻtarilib, 180 mamlakat orasida 140-oʻrinni egalladi. Daniya, Yangi Zelandiya va Finlyandiya eng kam korrupsiyalashgan davlatlar deb topilgan. Ularning har biri 88 ballni qoʻlga kiritgan.

Oʻzbekiston mazkur indeksda soʻnggi besh yil davomida barqaror oʻsish (2017-yilda 22 balldan 2021-yilda 28 ballgacha) qayd etib, mintaqadagi tez surʼatlarda yaxshilanib borayotgan davlatlar qatorida eʼtirof etildi.

Maʼlumot uchun, soʻrovnoma mustaqil tashkilotlar tomonidan oʻtkaziladi. Ushbu maʼlumotlarga asoslanib, dunyo mamlakatlari 0 dan 100 ballgacha boʻlgan shkala boʻyicha baholanadi. Nol korrupsiyaning eng yuqori darajasini, yuz esa eng past darajasini bildiradi.