Bugun Islom sivilizatsiyasi markazida “Amir Temur va temuriylar tamadduni” mavzusidagi xalqaro konferensiya doirasida “Turkiy dunyo adabiyoti” turkumiga kiruvchi to‘rt yangi kitob taqdimoti o‘tkazildi.

Qayd etilishicha, tadbir O‘zbekiston Yozuvchilar uyushmasi, Xalqaro Turksoy tashkiloti hamda markaz hamkorligida tashkil etildi.

Qozog‘iston Yozuvchilar uyushmasi, “Mereke baspalari” nashriyoti tomonidan “Turkiy dunyo adabiyoti” turkumida qozoq tilida turkiy adabiyotning taniqli namoyandalari Anarning “Qonaq uy bolmesi”, Xayriddin Sultonovning “Baqit jag‘alaui”, Sulton Rayevning “Topan”, Arslon Qoyshiyevning “Tuqimqurt” kitoblari chop etildi. Ushbu kitoblar azaldan tili, dili, madaniyati, urf-odat va an’analari o‘xshash bo‘lgan turkiy xalqlarni yana-da yaqinlashtirishga xizmat qiladi.

Taqdimotda qator xalqaro mehmonlar va yozuvchilar ishtirok etib, turkiy xalqlar o‘rtasidagi adabiy hamkorlikning mustahkamlanib borayotgani ta’kidlandi.

Shuningdek, tadbir davomida ayrim ijodkorlar yozuvchilar uyushmalariga qabul qilinib, yangi kitoblar ramziy tarzda taqdim etildi.