Qoraqalpogʻistonning Nukus shahrida fuqaro oʻz uyida Oʻzbekiston Respublikasi Qizil kitobiga kiritilgan sut emizuvchilar toifasiga kiruvchi 3 bosh jayronni saqlayotgani maʼlum qilindi. Bu haqida Qoraqalpogʻiston Respublikasi Ekologiya qoʻmitasining Matbuot xizmati xabar berdi.

Qayd etilishicha, shaharning A.Begimov koʻchasida yashovchi fuqaro oʻz uyida jayronlarni boqib kelayotgani maʼlum boʻlgach, 14-yanvar kuni ishchi guruh tomonidan vaziyat oʻrganilgan. Natijada haqiqatan ham mazkur manzilda sut emizuvchilar turiga kiruvchi 3 bosh jayron borligi aniqlangan.

Shundan soʻng fuqaroga yovvoyi hayvonlarni oʻzboshimchalik bilan boshqa joylarga koʻchirish, iqlimga moslashtirish va chatishtirish taqiqlangani boʻyicha tushuntiruv ishlari olib borildi.

Ayni vaqtda 3 bosh jayron Davlat ekologiya qoʻmitasining Quyi Amudaryo davlat Biorezervatining «Nazarxan» OFYda joylashgan volerda vaqtincha saqlash uchun olib borilgan.