“Soliqlarning yigʻiluvchanlik darajasini oshirish va faol soliq toʻlovchilarni ragʻbatlantirish chora-tadbirlari toʻgʻrisida”gi Prezident qarori (PQ–364-son, 28.11.2025-y.) qabul qilinib, qaror bilan soliq munosabatlarini tashkil etishda yangicha yondashuv qoʻllanadi. Bu haqda Adliya vazirligi maʼlum qildi.

Qarorga koʻra, 2026-yil 1-yanvardan boshlab jismoniy shaxslar “Ochiq byudjet” portalida oʻzlari tomonidan toʻlangan soliqlar hisobidan amalga oshiriladigan byudjet xarajatlari maʼlumotlarini “Jismoniy shaxslarning soliqlari hisobidan xarajatlar” modulida koʻrishi mumkin boʻladi.

Bunda quyidagilar doimiy ravishda eʼlon qilib boriladi:

- jismoniy shaxs tomonidan muayyan davrda toʻlangan daromad soligʻi, mol-mulk va yer soligʻi toʻgʻrisidagi maʼlumot;

- toʻlangan soliqlar evaziga Davlat byudjetidan amalga oshirilgan xarajatlar toʻgʻrisidagi maʼlumotlar.

2026-yil 1-yanvardan Namanganda yangi soliq boshqaruvi modelini joriy etish boʻyicha quyidagilarni nazarda tutgan holda eksperiment oʻtkaziladi:

- jismoniy shaxslardan olinadigan mol-mulk va (yoki) yer soligʻi boʻyicha 1 mln soʻmdan oshgan soliq qarzdorligini undirishda elektr energiyasining billing tizimi mexanizmidan foydalanishni joriy etish;

- soliq organlari faoliyatini baholashda inson omili taʼsirisiz avtomatik shakllanadigan eng muhim samaradorlik koʻrsatkichlarini joriy etishni tizimli davom ettirish.

2026-yil 1-yanvardan jismoniy shaxslar tomonidan koʻchmas mulklarni ijaraga berishdan olingan daromad boʻyicha toʻlangan soliq toʻliq miqdorda mulk joylashgan tuman (shahar) mahalliy byudjetlariga yoʻnaltiriladi.