Mobiuz telekommunikatsiya kompaniyasining xalqaro xususiylashtirish jarayoni boshlandi, deb yozadi Oʻzbekiston Respublikasi davlat aktivlarini boshqarish agentligi.

Unda agentlik “Universal Mobile Systems” MCHJ (savdo belgisi – Mobiuz) ustav kapitalidagi 100 foiz davlat ulushini xususiylashtirish boʻyicha xalqaro ochiq savdo jarayoni boshlanganini maʼlum qilgan. Unga koʻra, xususiylashtirish ochiq raqobat asosida amalga oshiriladi, unda ham mahalliy, ham xalqaro darajada barcha qiziquvchilar qatnashishi mumkin.

Savdo uch bosqichda amalga oshiriladi:

- sotib olishga qiziqish bildirish;
- majburiyatga ega boʻlmagan takliflarni qabul qilish;
- majburiyatga ega boʻlgan takliflarni qabul qilish

Qiziqish bildirgan investorlar 1-avgustgacha ariza topshirishi mumkin. Sanksiyaga tushgan shaxslar yoki ular bilan aloqasi bor kompaniyalar savdoda ishtirok eta olmaydi.