Hukumat qarori bilan Koʻp kvartirali uylarni boshqarish faoliyatini amalga oshirish qoidalari tasdiqlandi.

Nizomga muvofiq, koʻp kvartirali uylarni boshqarish faoliyati uy-joydan foydalanishda qulay va xavfsiz sharoitlarni yaratish, umumiy mol-mulkni saqlash va undan foydalanish uchun zarur xizmatlar va ishlarni qamrab oladi.

Koʻp kvartirali uyni boshqarish organi uyga kirish qismida quyidagi maʼlumotlarni doimiy joylashtirib borishi shart:

boshqarish organining nomi, manzili, telefoni, ish tartibi, veb-sayti;

kommunal xizmat koʻrsatuvchi tashkilotlarning aloqa telefonlari;

taʼmirlash ishlari vaqti;

majburiy badal, koʻrsatiladigan xizmatlar uchun toʻlov miqdori.

Boshqarish organi avariya vaziyatlarini bartaraf etadigan 24 soat ishlaydigan avariya-dispetcherlik xizmatini tashkil etishi kerak.

Bunda avariya-dispetcherlik xizmati mulkdorlarning qoʻngʻiroqlariga 3 minutdan koʻp boʻlmagan vaqtda javob berishi lozim.

Shuningdek, xonadonlardagi kanalizatsilar tiqilib qolganida va ifloslanish holatlari boʻlganida bu holatlar 2 soatda bartaraf etilishi kerak.

Sovuq, issiq suv, issiqlik va elektr taʼminoti va kanalizatsiya avariyaviy shikastlanganda bu holatlar 3 kunda bartaraf etiladi.