Oʻzbekiston oliy oʻquv yurtlari va texnikumlari diplomlarini Germaniyada tan olish masalasi 1-aprel kuni boʻlib oʻtgan investitsiyalar, sanoat va savdo vaziri oʻrinbosari Shohrux Gulamovning Germaniya taʻlim va migratsiya sohasi mutaxassislari delegatsiyasi bilan uchrashuvidagi mavzularidan biriga aylandi. Bu haqda ISSV matbuot xizmati xabar berdi.

Xususan, Oʻzbekiston taʻlim muassasalarini Germaniya Taʻlim va tadqiqot vazirligining ushbu mamlakatda xorijiy diplomlarni tan olishda foydalaniladigan ANABIN axborot bazasiga kiritish imkoniyatlari muhokama qilindi.

Tomonlar oʻzbek yoshlarini ilgʻor texnologiyalar boʻyicha oʻqitish va keyinchalik Germaniya korxonalariga ishga joylashtirish, shuningdek, Oʻzbekistonda ishlashni rejalashtirayotgan nemis mutaxassislariga imtiyozlar berish imkoniyatlarini ham koʻrib chiqdi.

Yigʻilishda Germaniya savdo-sanoat palatalari hududiy direktorlari, shuningdek, GP Günter Papenburg taʻsischi kompaniyasi tomonidan tashkil etilgan investitsiya kompaniyalari rahbarlari ishtirok etdi.

ANABIN (Anerkennung und Bewertung ausländischer Bildungsnachweise) — Germaniya Taʻlim va tadqiqot vazirligining (BMBF) rasmiy maʻlumotlar bazasi boʻlib, unda xorijiy diplomlar va taʻlim muassasalarining tan olinishi va baholanishi haqidagi maʻlumotlar mavjud.

Tizim chet el diplomining nemis taʻlim standartlariga mos kelishini baholaydi va nemis ish beruvchilari, universitetlari va davlat idoralariga chet el fuqarosi diplomi tan olinishi va nemis taʻlimi bilan solishtirish mumkinligini tushunishga yordam beradi.

Unda xorijiy taʻlim muassasalari roʻyxati va ularning holati toʻgʻrisidagi maʻlumotlar keltirilgan. Germaniyada ishlash yoki oʻqishni davom ettirish istagida boʻlgan chet elliklar uchun ANABINʻda ijobiy maqom viza, yashash uchun ruxsatnoma, malakani tasdiqlash va ishlashga ruxsat olish uchun muhim shart.