2025-yilning 1-mayidan boshlab Toshkent va Nukus shaharlari hamda viloyat markazlarida quyidagi yoʻnalishlarda yangi loyihalarni amalga oshirish taqiqlanadi:

▪️ asbest, sement ishlab chiqarish, shlam va shlaklar;

▪️ teri-koʻnchilik, parrandachilik fabrikalari;

▪️ samaradorligi yuqori boʻlgan chang-gaz tozalash inshootlari bilan jihozlanmagan har qanday turdagi koʻmir yoqish;

▪️ qora va rangli metallurgiya zavodlari, tarkibida zaharli aralashmalar boʻlgan oyna, zaharli kimyoviy moddalar bilan ishlash;

▪️ xavflilik darajasining I va II sinfiga mansub chiqindilarni qayta ishlash va yoqish korxonalari.

Bundan tashqari, 2025-yil yakuniga qadar AI-80 rusumli avtomobil yoqilgʻisidan foydalanish va sotish cheklanadi.

Respublikaning barcha hududlarida joylashgan issiqlik va elektr energiyasi ishlab chiqarish korxonalariga yoqilgʻi sifatida mazutdan foydalanishni toʻliq taqiqlanadi (avariyaviy yoqilgʻi sifatida Ekologiya, atrof-muhitni muhofaza qilish va iqlim oʻzgarishi vazirligini xabardor qilib, Vazirlar Mahkamasi bilan kelishgan holda foydalanish holatlari bundan mustasno).

Maʼlumot uchun, yuqorida keltirilgan koʻrsatmalarda keng jamoatchilik, xalqaro va mahalliy ekofaollar, Oʻzbekiston ekologik partiyasi hamda Ekologiya, atrof-muhitni muhofaza qilish va iqlim oʻzgarishi vazirligi taklifi inobatga olingan.