Qirg‘iziston prezident Sadir Japarov 5-noyabr kuni Bishkekda Turkiya yetakchisi Rajab Toyyib Erdo‘g‘on bilan muzokaradan so‘ng Turkiya Qirg‘izistonning mamlakat oldidagi tashqi qarzidan kechganini maʼlum qildi.

“Hurmatli prezident Erdo‘g‘onga Qirg‘iziston Respublikasining Turkiya Respublikasi oldidagi tashqi qarzini hisobdan chiqarish to‘g‘risida qabul qilingan qaror uchun alohida minnatdorlik bildirmoqchiman”, — deydi Japarov.

Qirg‘iziston prezidenti matbuot xizmati rahbarining aniqlik kiritishicha, qarz miqdori 58,8 million dollarni tashkil etgan bo‘lib, u “yashil iqtisodiyot” loyihalarini amalga oshirish evaziga hisobdan chiqarilgan.