Shavkat Mirziyoyev Qozogʻiston Prezidenti Qasim-Jomart Toqayevning taklifiga binoan bugun, 17-sentyabr kuni tongda “Markaziy Osiyo – Germaniya” sammitida ishtirok etish uchun Ostona shahriga joʻnab ketdi.

Maʼlumot uchun, mazkur sammit ikkinchi marta oʻtkazilmoqda. “Markaziy Osiyo – Germaniya” formatidagi birinchi sammit oʻtgan yili 29-sentyabr kuni Berlin shahrida oʻtkazilgan edi.

Xabarga koʻra, tadbirda koʻp qirrali hamkorlikni yanada kengaytirishning dolzarb masalalari muhokama qilinadi. Shuningdek, mintaqaviy hamkorlik istiqbollari yuzasidan fikr almashiladi.

Bundan tashqari, davlatlar yetakchilari Germaniyaning yirik kompaniya va banklari rahbarlari bilan uchrashuv oʻtkazadi.