Ariza qabul qilish va shartnoma berish jarayoni onlayn tarzda tashkil qilingan.

Ta’lim tashkilotlariga qabul qilish bo‘yicha davlat komissiyasi bayoni bilan 2024/2025 o‘quv yili qabulida to‘plagan ballari tasdiqlangan qabul parametrlari chegarasiga 4,05 ballgacha yetmagan abituriyentlar uchun 2 sentabrdan tabaqalashtirilgan to‘lov-kontrakt («Super kontrakt») uchun ariza qabul qilish va shartnoma berish boshlandi.

Shartnoma uchun arizalar kontrakt.edu.uz sayti orqali onlayn shakllantiriladi.

Avvalroq, tabaqalashtirilgan to‘lov-kontrakt miqdorlari tasdiqlangan to‘lov-kontrakt bo‘yicha qabul kvotalari chegarasiga nisbatan quyidagi miqdorda belgilangan edi:

- 1,05 ballgacha yetmagan abituriyentlar uchun — 1,5 barobar;

- 1,06 balldan 2,05 ballgacha yetmaganlar uchun — 2,0 barobar;

- 2,06 balldan 3,05 ballgacha yetmaganlar uchun — 2,5 barobar;

- 3,06 balldan 4,05 ballgacha yetmaganlar uchun — 3,0 barobar.

Bunda ushbu toifadagi abituriyentlar uchun to‘lov-kontraktning minimal miqdorlarini hisoblashda oliy ta’lim muassasalarida Davlat komissiyasi tomonidan tasdiqlangan (stipendiyasiz) bazaviy to‘lov-kontrakt bo‘yicha o‘qitish qiymati qo‘llaniladi.

Moliyaviy mustaqillik berilgan oliy ta’lim muassasalarida esa, 2024/2025-o‘quv yili qabuli uchun bakalavriat ta’lim yo‘nalishlari bo‘yicha o‘zlari belgilagan (stipendiyasiz) to‘lov-kontrakt miqdorlariga nisbatan yuqoridagi barobarlar hisoblanadi.