Jizzax viloyatining Zomin tumanida 27-iyun kuni II Xalqaro maqom sanʼati anjumani tantanali ravishda ochildi. Bu haqda Prezident matbuot xizmati xabar berdi.

Bu anjuman davlat rahbari tashabbusi bilan tashkil etilgan va birinchi festival 2018-yil Shahrisabzda oʻtkazilgan edi. Keyinchalik pandemiya tufayli kechiktirilgan sanʼat qurultoyi bu yil yangicha ruh va shukuh bilan qaytdi.

Tantanali ochilish marosimida prezident Shavkat Mirziyoyev nutq soʻzlab, maqom sanʼatining tarixi va ahamiyatini eʼtirof etdi.

“Bizning qadimiy tariximiz, boy madaniyatimiz, azaliy qadriyatlarimizning ramzi boʻlgan maqom sanʼati teran falsafiy ildizlari, betakror badiiy uslubi va boy ijodiy anʼanalari bilan maʼnaviy hayotimizda muhim oʻrin egallaydi. Maqom – umumbashariy tuygʻularni avj pardalarda tarannum etadigan nodir sanʼat turi sifatida ham biz uchun gʻoyat qadrlidir”, – dedi Shavkat Mirziyoyev.

Mumtoz musiqa sanʼati vakili boʻlgan oʻzbek maqomlari YUNESKOning Insoniyat nomoddiy madaniy merosi roʻyxatiga kiritilgan.

Marosimda YUNESKO Bosh konferensiyasi 42-sessiyasi prezidenti Simona Mikulesku, AYSESKO Bosh direktori Salim Muhammad al-Malik ham soʻzga chiqib, ishtirokchilar va mehmonlarni qutladi.

Shuningdek, anjumanda TURKSOY bosh kotibi Sulton Rayev, Turkiy madaniyat va meros fondi prezidenti Aktoti Raimkulova, Turkiy davlatlar Parlament assambleyasi bosh kotibi Mehmet Sureyya Er, Mustaqil Davlatlar Hamdoʻstligi bosh kotibi oʻrinbosari Nurlan Seytimov, Turkiya prezidentining bosh maslahatchisi Yalchin Topchu, Qozogʻiston prezidentining maslahatchisi Malik Otarbayev, Tojikiston prezidentining ijtimoiy rivojlanish, madaniyat va jamoatchilik bilan aloqalar boʻyicha yordamchisi Abdullo Rahmonzoda, Qirgʻiziston madaniyat, axborot, sport va yoshlar siyosati vaziri Oltinbek Maksutov, Ozarbayjon madaniyat vaziri Adil Gabil oʻgʻli Karimli qatnashdi. Umuman, festivalda Osiyo, Yevropa, Shimoliy va Janubiy Amerika, Afrika qitʼalarining 80 dan ortiq mamlakatidan qariyb 400 nafar mehmonlar ishtirok etmoqda.

Anjuman 30-iyunga qadar davom etadi. Yakunda “Eng yaxshi maqom ansambli”, “Eng yaxshi yakkaxon cholgʻu ijrochisi” va “Eng yaxshi yakkaxon xonanda” yoʻnalishlari boʻyicha gʻoliblar eʼlon qilinadi. Shuningdek, maqom sanʼatining nazariy va amaliy asoslari mavzusida xalqaro konferensiya, davra suhbatlari boʻlib oʻtadi.