Surxondaryo viloyatining Angor tumani hokimi “Ayollar daftari” mablagʻlari hisobidan Captiva 5 mashinasini sotib olgani aytilmoqda. Korrupsiyaga qarshi kurashish agentligi holat oʻrganilayotganini maʼlum qildi, deb xabar beradi Gazeta.uz.

Maʼlum boʻlishicha, hokimlik balansida boʻlgan 2018-yilda ishlab chiqarilgan Captiva (raqami 75 026 DAV) avtomobili 2022-yilning noyabr oyida YTHga uchragan va shu sababdan yaroqsiz holga kelgani maʼlum qilingan. Avtomobil 2023-yilning mart oyida auksionda 120 million soʻmga sotilgan.

2024-yilning fevral oyida esa hokim yangi avtomobil sotib olish uchun 349 mln soʻm ajratish toʻgʻrisidagi qaror imzolagan. Mazkur qaror asosida tuman hokimligi tomonidan 349,9 mln soʻmga Captiva 5 avtomashinasi xarid qilingan.

Ajablanarlisi, mazkur davlat xaridi manbai sifatida “Ayollar daftari”ga kiritilgan xotin-qizlarni qoʻllab-quvvatlash jamgʻarmasi koʻrsatilgan.

Maʼlumotga koʻra, tuman hokimligining Majburiy ijro byurosi organlaridagi umumiy qarzdorligi 1,4 mlrd soʻmni tashkil etadi.