Maʼlum boʻlishicha, Saudiya Arabistoni tashrif buyuruvchilar va aholini 2024-yilgi Haj ziyoratiga zarur ruxsatnomalarsiz qatnashishdan ogohlantirgan. Tizimning uzluksiz ishlashini taʼminlash va yuzaga kelishi mumkin boʻlgan huquqbuzarliklarni yumshatish maqsadida esa qattiq jazo choralari joriy etilgan.

Maʼlumotlarga koʻra, hukumat Haj ziyorati qoidalarini buzgan shaxslarga nisbatan jazo choralarini allaqachon belgilagan. Jumladan, zarur ruxsatnomalarsiz haj qilish noqonuniy hisoblanadi va aynan mana shu tartibni buzgan fuqarolar 50 ming rial toʻlaydi. Tegishli ruxsatnomasiz ziyoratchilarni olib kelayotgan shaxslar ham 50 ming rialgacha jarimaga tortiladi.

Bunday qonunbuzarliklarda aybdor deb topilgan chet ellik fuqarolar esa olti oylik qamoq bilan jazolanadi. Shuningdek, qamoq muddati tugagach, Saudiya Arabistonidan deportatsiya qilinadi. Bunday shaxslar uchun 10 yil davomida mamlakatga kirish taqiqlanadi.

Shu bilan birga, qoidalarni buzganlar ommaviy axborot vositalari orqali keng jamoatchilikka koʻrsatiladi.