Oʻzbekiston Respublikasi Konstitutsiyasi qabul qilinganligining 29 yilligi munosabati bilan Respublika Maʼnaviyat va maʼrifat markazi va Ichki ishlar vazirligi hamkorligida «Konstitutsiya – milliy taraqqiyotimiz koʻzgusi» mavzusidagi maʼnaviy-maʼrifiy tadbir oʻtkazildi.

Unda Respublika Maʼnaviyat va maʼrifat markazi rahbari Minhojiddin Hojimatov, Ichki ishlar vaziri oʻrinbosari Azizbek Ikramov hamda “Maʼrifat” targʻibotchilar jamiyati aʼzolari, shuningdek, ichki ishlar organlari xodimlari ishtirok etdi.

Tadbir davomida Konstitutsiyamizning yaratilish tarixi, uning demokratik-huquqiy davlat barpo etish va inson manfaatlarini taʼminlashdagi ahamiyati, xalqchilligi bilan birga xalqaro huquq normalariga mosligi haqida atroflicha maʼlumot berildi. Tadbir Ichki ishlar vazirligi Madaniyat saroyi ansambli xonandalarining musiqiy chiqishlari bilan davom etdi.

Yakunda Respublika Maʼnaviyat va maʼrifat markazi rahbari Minhojiddin Hojimatov Ichki ishlar vaziri oʻrinbosari Azizbek Ikramovga “Maʼnaviyat fidoyisi” koʻkrak nishonini topshirdi.