Livan poytaxti Bayrut shahrida dzyudo boʻyicha oʻsmirlar va yoshlar oʻrtasidagi oʻtkazilayotgan Osiyo chempionatida Oʻzbekiston oʻsmirlar terma jamoasi katta farq bilan birinchi oʻrinni egalladi. Bu haqida Oʻzbekiston Milliy Olimpiya qoʻmitasi matbuot xizmati xabar berdi.

Qayd etilishicha, ikki kunlik bahslar yakuniga koʻra, Oʻzbekiston 9 ta oltin, 5 ta kumush, 5 ta bronza medali bilan umumjamoa hisobida birinchi oʻrinni egallagan.

Shuningdek, Qozogʻiston terma jamoasi 3 ta oltin, 8 ta kumush, 1 ta bronza medali bilan ikkinchi oʻrinni egallagan boʻlsa, Janubiy Koreya 3 ta oltin, 1 ta kumush, 7 ta bronza medali bilan kuchli uchlikni tamomlagan.