Oʻzbekiston hukumati gaz tariflari oshirilganidan keyin avtomobillarga gaz toʻldirish kompressor shoxobchalarida narxlarning keskin oshishini cheklash choralarini koʻrmoqchi. Bu Vazirlar Mahkamasining yoqilgʻi-energetika tarmogʻida bozor mexanizmlarini bosqichma-bosqich joriy etish toʻgʻrisidagi qarori loyihasida nazarda tutilgan.

Hujjatda bosh vazir oʻrinbosari Jamshid Qoʻchqorov, Bosh prokuratura, Davlat xavfsizlik xizmati, Korrupsiyaga qarshi kurashish agentligi, Raqobatni rivojlantirish va isteʼmolchilar huquqlarini himoya qilish qoʻmitasi, Soliq qoʻmitasi va “Oʻzneftgaz” inspeksiyasiga oʻrnatilgan gaz hisoblash uskunalarining Tabiiy gaz nazorati va hisobining avtomatlashtirilgan tizimiga toʻliq ulanganligini va onlayn rejimda maʼlumotlar uzatilayotganligini qatʼiy nazorat qilish vazifasini yuklash taklif etilgan.

Shuningdek, ular noqonuniy ulanish, yoqilgʻi-energiya resurslarini talon-toroj qilish va noqonuniy isteʼmol qilishning boshqa holatlarini, shuningdek, ularni sodir etishga imkon beruvchi sabab va shart-sharoitlarni aniqlash, bartaraf etish va oldini olish boʻyicha nazorat tadbirlarini yanada kuchaytirishlari kerak boʻladi.

Bundan tashqari, guruhga kelgusi olti oyda gaz toʻldirish shoxobchalarida tabiiy gazning maksimal chakana narxi 1 kubometr uchun 3250 soʻmdan oshmasligini taʼminlash yuzasidan qatʼiy choralar koʻrish topshirilishi mumkin.

Tizimga hisobga olish priborlari ulanmagan va maʼlumotlarni onlayn tarzda uzatmayotgan yoqilgʻi quyish shoxobchalari cheklangan chakana narxlarning asossiz oshib ketishiga, yoqilgʻi-energetika resurslarining noqonuniy isteʼmol qilinishiga, oʻgʻirlanishiga yoʻl qoʻysa, gaz taʼminoti toʻxtatiladi.

Mazkur loyihada yuridik shaxslar uchun bir kubometr gaz narxini 660 soʻmdan 1500 soʻmga (2,3 baravar yoki +840 soʻm), elektr energiyasi narxini 450 soʻmdan 900 soʻmga (ikki baravar yoki +450 soʻm) oshirish taklif etilgan. Aholi uchun esa tariflar oʻzgarishsiz qoladi. Bugungi kunda AGTKSHda bir kubometr gazning oʻrtacha narxi 2800 soʻmni tashkil etadi.

Avgust oyida Toshkent va Oʻzbekiston viloyatlari haydovchilari yana koʻplab gaz quyish shoxobchalari yopilgani haqida xabar berishdi, buning natijasida yonilgʻi quyish shoxobchalarida uzun navbatlar paydo boʻldi. Energetika vazirligi yonilgʻi quyish shoxobchalariga kelishilgan hajmda gaz yetkazib berilganini maʼlum qildi. Shu bilan birga, talabning oʻsganini tan oldi.

Energetika vazirligi, shuningdek, garchi u yerda cheklovlarni belgilash mezonlari koʻrsatilmagan boʻlsa-da, Oʻzbekistondagi yonilgʻi quyish shoxobchalarida kunlik limit hukumat tomonidan tasdiqlangan resurslar balansi va gaz taqsimoti doirasida joriy etilayotganini tushuntirdi.