“Dok-1 Maks” siropidan bolalar oʻlimi boʻyicha sud majlisida sudya Samarqand viloyati Sogʻliqni saqlash boshqarmasining sobiq boshligʻi qamoqqa olinganini maʼlum qildi.

Daryo nashriga koʻra, bu haqda “Dok-1 Maks” ishi boʻyicha Toshkent shahrida koʻrilayotgan sud ishida sudya Muso Yusupov sudlanuvchilardan birining soʻroviga javoban maʼlum qilgan.

Avvalroq ushbu ayblanuvchi sirop haqida jamoatchilikni xabardor qilgan samarqandlik shifokorlar va viloyat SSB boshligʻini sudga chaqirib, ularning koʻrsatmasini olish boʻyicha iltimosnoma kiritgandi.

“Samarqand viloyati sogʻliqni saqlash boshqarmasi boshligʻiga nisbatan bu boʻyicha qamoqqa olish tarzidagi ehtiyot chorasi qoʻllanilgan. Qoʻshimcha jinoyat ishi qoʻzgʻatilib, tergov harakatlari olib borilmoqda”, — deya taʼkidladi sudya.