Ijtimoiy tarmoqda «Perevalda baliq yomgʻiri» sarlavhasi ostidagi video tarqaldi. IIV YHXBB holat boʻyicha maʼlumot berdi.

Qayd qilinishicha, 2021-yil 26-noyabr kuni soat 16:30 larda, Namangan viloyati, Pop tumani hududidan oʻtgan A-373 “Toshkent-Oʻsh” avtomobil yoʻlining 227-kilometrida haydovchi, 1976-yilda tugʻilgan F.A. boshqaruvidagi “Zamyad” rusumli avtomobilning shinasi havo chiqarib yuborishi oqibatida, transportga ortilgan bochka agʻdarilgan va bochka ichida boʻlgan baliq mahsulotlari avtomobil yoʻliga sochilib ketgan.

Hodisa natijasida tan jarohati olgan fuqarolar yoʻq.

Hozirda holat yuzasidan Namangan viloyati IIB YHXB xodimlari tomonidan qoʻshimcha surishtiruv olib borilmoqda.