“Toshshahartransxizmat” yoʻlovchilardan kelib tushgan murojaatlar asosida 4-sentyabrdan qoʻshimcha 7 ta yangi avtobus yoʻnalishlari tashkil etilganini eʼlon qildi.

Qayd etilishicha, taʼlim maskanlarida navbatdagi oʻquv yili boshlanishi munosabati bilan, jamoat transporti xizmatlaridan foydalanuvchi yoʻlovchilar oqimi ortishi sababli, yoʻlovchilarga koʻrsatilayotgan transport xizmatlari sifatini oshirish hamda yoʻlovchilar tashish uzluksizligini taʼminlash maqsadida tashkil etildi.

4-sentyabrdan boshlab poytaxtdagi avtobus yoʻnalishlari soni 167 taga yetkaziladi hamda kunlik ishga chiqarilayotgan avtobuslar soni 1700 taga oshiriladi.

Shuningdek, 2023/2024-oʻquv yili boshlanishi munosabati bilan 4-sentyabrdan boshlab quyida keltirilgan ekspress yoʻnalishlari vaqtinchalik harakatini boshlaydi:

• “TashPTI (SamPI) — Buyuk ipak Yoʻli metrosi” Mirzo Ulugʻbek shoh koʻchasi orqali 5 dona;
• “TTZ ASHB — Buyuk ipak Yoʻli metrosi” Mirzo Ulugʻbek shoh koʻchasi orqali 5 dona;
• ”TTZ ASHB — Buyuk ipak Yoʻli metrosi” Buyuk ipak Yoʻli koʻchasi orqali 5 dona katta hajmli MAN RR3 rusumli turistik avtobuslar aholiga transport xizmatlarini koʻrsatadi.

Yoʻnalishning ish vaqti soat ertalab 7:30 dan 9:30 gacha va kechki 16:30 dan 20:00 gacha tashkil etiladi.

Yoʻnalishlarning yoʻlkira haqi 2000 soʻm etib belgilangan.