Oʻzbekistonda safarbarlik chaqiruv rezervining (1 oylik harbiy xizmat) toʻlov badali mehnatga haq toʻlashning eng kam miqdorining 7 barobariga (6 mln 860 ming soʻm) teng. Bu haqda 18-avgust kuni AOKAda oʻtkazilgan brifingda Mudofaa vazirligi axborot xizmati rahbari Otabek Yoʻldoshev maʼlum qildi.

Toʻlov badalini 1 yil davomida boʻlib toʻlash ham mumkin.

“Prezident qaroriga asosan, Oʻzbekiston fuqarolarining safarbarlik chaqiruv rezervining toʻlov badali mehnatga haq toʻlashning eng kam miqdorining 7 barobari (6 mln 860 ming soʻm) etib belgilangan. Vazirlar Mahkamasining 2003-yil 22-fevraldagi qaroriga muvofiq, safarbarlik chaqiruv rezervi safiga olingan shaxslar tomonidan pul badallari xizmatga olingandan keyin tomonlarning kelishuviga koʻra, 1 yil mobaynida biryoʻla toʻliq hajmda yoxud bosqichma-bosqich amalga oshirilishi mumkin”, — dedi Otabek Yoʻldoshev.

 

Maʼlumot uchun, ayni paytda Oʻzbekistonda mehnatga haq toʻlashning eng kam miqdori 980 000 soʻm.