Buxoro shahridagi 2-umumtaʼlim maktabi bitiruvchisi Parviz Tuksanov oʻtgan oʻquv yilida bilish darajasini belgilovchi xalqaro IELTS imtihonida 8.5 ballni qoʻlga kiritib, bu borada mamlakatimiz yoshlari orasida eng yaxshi natijani qayd etgan edi.

Joriy yilda esa u SAT imtihonida 1560 ballni qoʻlga kiritib, rekord natijani qayd etdi.

SAT imtihoni - “akademik baholash testi” boʻlib, abituriyentlarning tanqidiy fikrlash koʻnikmalarini tekshirish uchun oʻtkaziladigan xalqaro imtihon. Dunyoning eng nufuzli oliygohlarida oʻqish istagida boʻlgan yoshlar, albatta SAT sertifikatiga ega boʻlishlari shart.

“Parvizning maqsadi - TOP-5 talikka kiruvchi oliygohlarda tahsil olib, mamlakatimiz ravnaqiga munosib hissa qoʻshishdir. Yuksak marralarni koʻzlayotgan bu iqtidorli va tirishqoq oʻquvchiga omad tilab qolamiz”, deyiladi Maktabgacha va maktab taʼlimi vazirligi bergan maʼlumotda.