2022-yilda 60 mingga yaqin oʻzbekistonlik boshqa davlatlarga ishlash uchun ketgan. Bu haqda Kambagʻallikni qisqartirish va bandlik vazirligi kanaliga joylangan lavhada maʼlum qilindi.

Oʻtgan yili 60 ming nafarga yaqin oʻzbekistonlik boshqa mamlakatlarga qonuniy ishga joʻnatilgan.

Tahlillarga koʻra, 2000-yilda dunyo boʻyicha migrantlar soni 96 million kishini, 2022-yilda bu raqam 164 million kishini tashkil etgan. Shundan 46 foizi ayollar hissasiga toʻgʻri keladi.

Oʻzbekiston aholisining 2 million nafardan koʻp qismi boshqa davlatlarda turli sohalarda mehnat qilmoqda. Xususan, eng koʻp — 1,5 milliondan oshiq oʻzbekistonlik muhojirlar Rossiyada ishlaydi.

Maʼlum qilinishicha, bugungi kunda mamlakat mehnat bozoriga har yili 700 mingga yaqin yangi ishchi kuchi kirib keladi. Oʻzbekistonda 1,3 milliondan ortiq odam kambagʻallik boʻyicha roʻyxatda turadi.

Mamlakatga 2000-yilda migrantlar hisobidan 790 million dollarlik pul oʻtkazmalari kelib tushgan boʻlsa, bu koʻrsatkich 2022-yilda 8 milliard dollarni tashkil etgan.

Oyina.uz'ni Telegramda o‘qing!