“Ochiq budjet”ga beriladigan mablagʻ 3 karra oshirilib, 24 trillion soʻmga yetkaziladi

Saqlash
16:05 / 30.05.2023 833 0

Oʻzbekistonda hokimlar kengash oldida, xalq oldida hisobdor boʻlgan tizim joriy etiladi. Bu haqda prezidentlikka nomzod Shavkat Mirziyoyev maʼlum qildi.

 

Taʼkidlanishicha, mol-mulk va yer soliqlari mahallada qolishi hisobiga, mahalla byudjetida yiliga 3 trillion soʻm mablagʻ paydo boʻladi.

 

Kelgusi yilda “Ochiq budjet”ga beriladigan mablagʻ 3 karra oshirilib, 24 trillion soʻmga yetkaziladi. Mahalla raislarining vakolat muddati 3 yildan 5 yilga uzaytiriladi.

 

“Biz ochiqlik siyosatini izchil davom ettirib, ommaviy axborot vositalari faoliyatining erkinligi, fuqarolarning axborot olish, foydalanish va tarqatishga boʻlgan huquqlarini qatʼiy kafolatlaymiz.

 

Nodavlat notijorat tashkilotlarini yanada qoʻllab-quvvatlab, ular uchun barcha sharoitlarni yaratamiz. Bizning maqsadimiz aniq va oʻzgarmasdir – demokratik davlat va fuqarolik jamiyati qurish yoʻlini milliy taraqqiyotga erishishning yagona toʻgʻri yoʻli deb hisoblaymiz”, dedi Prezident.

Izoh yo‘q

Izoh qoldirish