28-may kuni mahalliy vaqt bilan soat 23:20 da Mahan Air aviakompaniyasining Tehron — Pekin yo‘nalishi bo‘yicha IRM079 reysi samolyoti Toshkentga favqulodda qo‘ndi, deya xabar bermoqda Uzbekistan Airports matbuot xizmati.

Holatga yo‘lovchining yurak xurujiga uchragani sabab bo‘lgan. Uning sog‘lig‘i yomonlashgani sababli ekipaj muqobil aerodromga o‘tishga qaror qilgan.

Samolyot aeroportga qo‘ngach, yo‘lovchi tez yordam mashinasida olib ketilgan va tibbiy muassasaga yotqizilgan.

Taxminan soat 00:40 da samolyot Toshkentdan belgilangan manzilga uchib ketdi.