Farg‘ona va Namangan viloyatlarida shoir Shuhrat Orif va xonanda Baxtiyor Rahmonov ishtirokida “Sog‘inmasdan yashab bo‘lmaydi” mavzusida she’r va qo‘shiq kechalari bo‘lib o‘tdi.

Qo‘qondagi “Temiryo‘lchilar” madaniyat saroyida o‘tkazilgan anjumanda Qo‘qon davlat pedagogika institutining pedagog va talabalari, ijodkorlar, ijodiy-madaniy masalalar bo‘yicha targ‘ibotchilar  qatnashdi. 

Tadbirda shoir yangi she’laridan o‘qib berdi. Xonanda Baxtiyor Rahmonovning diltortar qo‘shiqlari davraga o‘zgacha kayfiyat bag‘ishladi.

Farg‘ona davlat universitetida bo‘lib o‘tgan uchrashuvda Respublika Ma’naviyat va ma’rifat markazining Farg‘ona viloyat bo‘limi rahbari Mas’udjon Sulaymonov adabiy-musiqiy tadbirlar aholining, ayniqsa, yoshlarning ruhiy olamini boyitishga xizmat qilishini ta’kidladi.

Navbatdagi she’r va qo‘shiq kechasi Namangan shahridagi “Yangi O‘zbekiston – yoshlar ziyo maskani” axborot-kutubxona markazida tashkil etildi. 

O‘zbekiston Yozuvchilar uyushmasi Namangan viloyat bo‘limi rahbari Ziyovuddin Mansur, “Milliy tiklanish” demokratik partiyasining viloyat kengashi raisi Dilnoza Azizova va boshqa so‘zga chiqqanlar ijodiy uchrashuvlarning yoshlarda kitobxonlikka qiziqishni kuchaytirishdagi o‘rni muhimligini bildirishdi.