Ijtimoiy tarmoqlar orqali Qarshi shahrida oʻrnatilishi toʻxtatilgan bayroq ustuni qayta bunyod etilishi toʻgʻrisida xabarlar tarqaldi. Qarshi shahar hokimligi axborot xizmati ushbu holatga munosabat bildirdi.

«Qarshi shahrida oʻrnatiladigan bayroq ustunining qurilish ishlari Qarshi shahar mahalliy byudjetining 2021-yilning III-chorak yakuni boʻyicha daromadlar rejasining oshirib bajarilgan qismidan ajratilgan mablagʻlar hamda homiylik yordami hisobiga davom ettirilishi xabar qilingan.

 

Ijtimoiy tarmoqlarda muhokamalarga sabab boʻlgan bu masalaga viloyat hokimi eʼtibor qaratib, shahar hokimi bilan kelishgan holda ulkan bayroq ustuni qurilmaydigan boʻldi», – deyiladi munosabatda.

Hokimlikning qoʻshimcha qilishicha, daromadlar rejasining oshirib bajarilgan qismidan qolgan mablagʻlar ichki yoʻllar taʼmiri va kommunal sohalarni rivojlantirishga yoʻnaltiriladi.