Twitter ijtimoiy tarmogʻining oʻzbek segmentida oʻziga xos chellenj boshlandi.

Unda tarmoq foydalanuvchilari maʼlum bir kitobni biror manzilda koʻzdan panaroq joyda qoldiradi va buni suratga olib, oʻz sahifasida eʼlon qiladi. Oʻz navbatida, manzilga borib, kitobni qoʻlga kiritgan odam ham bu haqda “tvit” qoldiradi.

Qayd etish kerak, chellenj qatnashchilarining aksariyati kitoblarni qoldirish uchun metro bekatlaridagi bankomatlar va uning yon-atrofini afzal bilmoqda.

Shu bilan birga foydalanuvchilar orasida kitob qoldirib ketayotganlarni ehtiyot boʻlishga chaqirayotganlar ham topilmoqda.

“Kitob oldi-berdisiga hech qanday adovatim yoʻq. “Zakladchik”lar sintetik vositalarni shunaqa yerga qoʻyib ketishadi, boshqasi kelib olib ketadi. Kitob bahonasida ular ham shunday ish qilishayotgandir. Kitoblar uchun maxsus “butkalar” qilinsa, ajoyib yechim boʻlardi”, – deb yozadi foydalanuvchilardan biri.

Ushbu fikrga qarshi chiqib, yoshlarning tashabbusini “oʻldirmaslik”ka chaqirayotganlar ham yoʻq emas. Xususan, “BookClubUz” loyihasi asoschisi shunday deb yozadi: “Yaxshi, samimiy gʻoya bilan chiqqan yoshlarni qoʻrqitib, tashabbusni “oʻldirish” kerakmi yoki oddiy kitob tarqatishni muammoga aylantirishi mumkin boʻlgan ildizga yuzlanish kerakmi?”