Oʻzbekiston Respublikasi Prezidentining topshirigʻiga asosan birinchi marotaba Oʻzbekiston Milliy atlasi yaratildi. Bu haqda Kadastr agentligi axborot xizmatiga xabar berdi.

Oʻzbekiston Milliy atlasi 416 ta xaritalarni oʻzida jamlagan 2 jilddan iborat boʻlib, Oʻzbekiston Respublikasining barcha sohalarini kartografik va matnli koʻrinishda tavsiflovchi fundamental ilmiy-maʼlumotnoma asari hisoblanadi.

Atlasda Respublikamizning “Tabiiy-geografik oʻrni va umumiy xususiyatlari”, “Tabiiy sharoiti va tabiiy resurslari”, “Ekologiya va atrof-muhit muhofazasi”, “Aholisi”, “Ijtimoiy” va “Iqtisodiyot sohalari” hamda “Tarixi” aks ettirilgan.

Milliy atlas, Davlat soliq qoʻmitasi huzuridagi Kadastr agentligi va “Kartografiya” davlat ilmiy-ishlab chiqarish korxonasining 100 dan ortiq mutaxassislari, Fanlar akademiyasining yetuk olimlari, vazirlik va idoralarning vakillari hamda oliy taʼlim va boshqa ilmiy maqomga ega boʻlgan tashkilotlardan jalb etilgan ekspertlar hamkorligida yaratildi.