Oliy Majlis Qonunchilik palatasi deputati Rasul Kusherbayev deputatlik faoliyatini yakunlaganini eʼlon qildi. Bu haqda u oʻz Telegram-kanalida maʼlum qildi.

“Deputatlik faoliyatimni yakunlashga qaror qildim. Bunday ishlay olmas ekanman.

Bunga majbur boʻlganimdan afsusdaman.

Ishonch bildirgan, qoʻllab-quvvatlagan barchaga rahmat! Rozing boʻlinglar!

Nasib qilsa qolganini vaqt koʻrsatadi. Alloh madadkor boʻlsin”, – deb yozadi u.

Avvalroq u Twitter sahifasida davlat budjeti loyihasining joriy muhokamasida qatnashmagani haqida yozgan edi.

“Bu safargi budjet muhokamalarida ishtirok etmadim. Katta hajmdagi loyihani oʻqishga ham yetarli vaqt berilmadi. 1-oʻqishda yalpida soʻz soʻrasam “zam” spiker Ulugʻbek Inoyatov ochiqchasiga soʻz bermadi. Soʻng majlisdan chiqib ketdim va kirmadim.

Deputatlarni ogʻzini yopadigan “zam”larni boridan yoʻgʻi yaxshi”, – deb yozgandi Rasul Kusherbayev.