Margʻilon shahar Xalq taʼlimi boʻlimi boshligʻi taʼlim tizimini muntazam ravishda tanqid qilgani sabab unga nisbatan jinoyat ishi qoʻzgʻatilib, qamoqqa olingani haqida video xabarlar tarqaldi. Bosh prokuratura matbuot kotibi Hayot Shamsutdinov holat yuzasidan rasmiy maʼlumot berdi.

Aniqlanishicha, Margʻilon shahar prokuraturasi tomonidan shahar Xalq taʼlimi boʻlimi mansabdor shaxslariga nisbatan qoʻzgʻatilgan jinoyat ishi yuzasidan tergov harakatlari olib borilmoqda.

Tergovda Margʻilon shahar xalq taʼlimi boʻlimi sobiq boshligʻi qurilish-taʼmirlash ishlari davomida jami 1,7 milliard soʻm miqdordagi mablagʻlarni talon-toroj qilgani va davlat manfaatlariga juda koʻp miqdorda zarar yetkazgani aniqlangan. Shu sabab, 1-noyabr kuni u gumonlanuvchi tariqasida protsessual tartibda ushlangan.

Ayni paytda tergov harakatlari davom etmoqda.