Oʻzbekiston Vazirlar Mahkamasining joriy yil 24-oktyabr kuni qabul qilingan qarori bilan “Oliy taʼlim aʼlochisi” hamda “Oʻrta maxsus va professional taʼlim aʼlochisi” koʻkrak nishonlari taʼsis etildi. 

Qarorga muvofiq koʻkrak nishonlari bilan oliy, oʻrta maxsus va professional taʼlim sohasida fidokorona mehnat qilayotgan, sogʻlom va barkamol avlodni voyaga yetkazish, yosh avlodni Vatanga muhabbat va sadoqat ruhida tarbiyalash borasida alohida namuna koʻrsatib, soha rivojiga munosib hissa qoʻshib kelayotgan fuqarolar taqdirlanadi.

Koʻkrak nishonlari bilan mukofotlash Oliy va oʻrta maxsus taʼlim vaziri buyrugʻi asosida amalga oshirilib, u mukofotlangan shaxslarga 1-oktyabr – Oʻqituvchi va murabbiylar kuni arafasida topshiriladi.