12-oktyabr kuni prezident “Nogironligi boʻlgan shaxslar jamiyatlariga tegishli tashkilotlarni davlat tomonidan qoʻllab-quvvatlash hamda nogironligi boʻlgan shaxslarning bandligiga koʻmaklashishga oid qoʻshimcha chora-tadbirlar toʻgʻrisida”gi [PQ-390-sonli] qarorga qoʻl qoʻydi. Bu haqda Adliya vazirligi xabar berdi.

Yagona ishtirokchisi nogironligi boʻlgan shaxslarning jamoat birlashmalari hisoblangan yuridik shaxslar ishlab chiqarayotgan mahsulotlar:

• koʻrgazma yarmarkasi doimiy tarzda oʻtkaziladi;
• hajmi va texnik parametrlari toʻgʻrisidagi axborotlar 15-noyabrga qadar Elektron kooperatsiya portaliga joylashtiriladi;
• 1-yanvarga qadar yagona reyestri yuritilishi tashkil etiladi.

1-yanvardan boshlab davlat xaridlari doirasida tegishli tashkilotlar xarid predmeti hajmining kamida 10 foizi miqdorida oʻz hududida Reyestrga kiritilgan korxonalar ishlab chiqargan tovarlarni sotib oladi.

2022-yil davomida tajriba tariqasida Nukus va Toshkent shaharlarida hamda 2023-yildan boshlab qolgan hududlarda “Imkoniyatlar markazi” faoliyati tashkil etiladi.

“Imkoniyatlar markazi”:

– nogironligi boʻlgan shaxslarning huquqlari va qonuniy manfaatlarini himoya qilish maydoni sifatida faoliyat yuritadi;

– nogironligi boʻlgan shaxslarning qiziqishidan kelib chiqqan holda kasb-hunarga oʻqitishga koʻmaklashadi.