Toshkent 12-oktabr kuni havosi eng ifloslangan shaharlar qatoridan oʻrin oldi. Bu haqda gidrometeorologik tadqiqotlar muallifi Erkin Abdulahadov oʻz kanalida yozdi.

“Havoda mayda PM-2,5 dispers zarrachasining meʼyoriy qiymatlaridan ortishi havoning sifat darajasi “qoniqarsiz” boʻlishini taʼminladi. Mazkur koʻrsatkich bilan poytaxt Toshkent soat 18:00 da dunyoning yirik shaharlari orasida havoning ifloslanishi boʻyicha 8-oʻrinda qayd etildi”, deb yozadi Erkin Abdulahadov.

12-oktabr 18:00 holatiga koʻra Qozogʻiston poytaxti Ostona havosi eng ifloslangan shahar sifatida qayd etilgan. Shuningdek, Chengdu, Pekin, Uhan (Xitoy), Lahor (Pokiston), Dubay (BAA), Dehli (Hindiston) shaharlarida ham havoning keskin ifloslanishi kuzatilgan.