Boʻstonliq tumanida qalbaki pullarning muomalaga kiritilishi oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.

Bosh prokuratura huzuridagi departamentning Toshkent viloyati Boʻstonliq tuman boʻlimi tomonidan IIB xodimlari bilan hamkorlikda tezkor tadbir oʻtkazilgan.

Unda, fuqarolar M. A. va Yu.M. foydalanuvida boʻlgan Lacetti rusumli avtotransport vositasi saloni koʻzdan kechirilganda, 52 dona 100 ming soʻmlik, 19 dona 50 ming soʻmlik va 11 dona 200 ming soʻmlik qalbaki kupyuralar borligi aniqlanib, ashyoviy dalil sifatida olingan.

Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qogʻozlar yasash, ularni oʻtkazish) bilan jinoyat ishi qoʻzgʻatildi.

Maʼlum qilinishicha, hozirgi vaqtda tergov harakatlari oʻtkazilmoqda.