Yangi haftada havo harorati kechasi va ertalab +10-15 gacha pasayadi.

Oʻzgidrometning xabar berishicha, 26-sentabr Oʻzbekiston hududi boʻyicha yogʻingarchiliksiz, asosan, kam bulutli ob-havo saqlanib turadi. Mamlakat hududining katta qismida kunduzgi havo harorati yuqori boʻladi va +30-35 ni tashkil etadi. Faqat Oʻzbekistonning shimoliy hududlariga Volga boʻyi hududlaridan sovuq antitsiklon kirib keladi. Qoraqalpogʻistonda, Xorazm viloyatida havo harorati +20-25 gacha pasayadi.

27-sentabrga havo massasining kirib kelishi respublikaning barcha hududlariga tarqaladi va hafta oxirigacha Oʻzbekiston hududi nisbatan sovuq antitsiklon periferiyasi taʼsiri ostida boʻladi. 27-sentabrdan boshlab respublikaning barcha hududlari boʻyicha havo sovuqlashadi, kunduzgi harorat +22-27 gacha pasayadi. 29-30 sentabrda kechalari harorat pasayadi, kechasi va ertalab termometr ustuni +10-15 gacha pasayadi.

26-27 sentabr kunlari front oʻtishida baʼzi joylarda shamol chang-toʻzonlar bilan 15-20 m/s gacha kuchayishi kutilmoqda. Janubning eng chekkasida va Fargʻona vodiysida shamolning kuchayishi 21-23 m/s ga yetishi mumkin.

Respublikaning tekislik hududlarida yogʻingarchilik kutilmaydi, faqat ertaga 27 sentabr kuni togʻ oldi va togʻli hududlarda baʼzi joylarda biroz yomgʻir yogʻadi.